Dit verbaas hom nie dat boere vanjaar meer mielies as verlede jaar wil plant nie, ondanks sy pleidooie dat hulle minder moet plant om die prys nie verder te laat tuimel nie.

"Boere het verlede jaar minder mielies geplant weens die droogte en het nie 'n keuse as om vanjaar meer te plant om te kan oorleef nie," het mnr. Bully Botma, voorsitter van Graan Suid-Afrika, gereageer op die Oesskattingskomitee se bekendmaking van die eerste voorneme van boere om mielies te plant.

Volgens die komitee se opname wil boere vanjaar 2,854 miljoen hektaar mielies plant wat 208 000 hektaar (amper 8 %) meer is as verlede jaar.

Botma het twee weke gelede 'n dringende beroep op boere gedoen om minstens 412 000 hektaar minder wit mielies te plant as verlede jaar, maar volgens die komitee se opname beoog boere om inderdaad 83 100 hektaar méér wit mielies as verlede jaar te plant.

Graan SA het aanbeveel dat boere 1 100 hektaar meer geel mielies moet plant. Volgens die opname van die komitee blyk dit dat boere in hierdie stadium 125 000 hektaar meer geel mielies wil plant.

Botma het die blaam op die staat gepak vir die dilemma waarin die land se mielieboere hulle bevind. Hy reken die Regering kom nie sy plig na deur toe te laat dat hoogs gesubsidieerde mielies steeds ingevoer word.

Verlede jaar is 808 000 ton mielies ingevoer, waarvan 274 000 ton wit en 534 000 ton geel mielies was. Dié groot invoer was deels daarvoor verantwoordelik dat 2,624 miljoen ton mielies vanjaar in Mei na die nuwe seisoen oorgedra is, waarvan 2,123 miljoen ton wit en 501 000 ton geel mielies was. In die eerste drie maande van vanjaar is reeds 86 000 ton geel mielies ingevoer.

Botma het gesê dat daar weer vanjaar te veel mielies in die land gaan wees, terwyl die Regering nie sy plig nakom om die plaaslike bedryf teen die goedkoop gesubsidieerde ingevoerde produkte te beskerm nie. Dit veroorsaak lae pryse en nog duisende mense wat hul werk gaan verloor as gevolg daarvan gaan verloor.

Volgens die komitee se finale skatting beloop die mielie-oes vir 2003/04 wat op 30 April ten einde geloop het, 8 706 250 ton. Dit is 227 400 ton meer as die vorige skatting 'n maand gelede. Die oes is saamgestel uit 5 346 150 ton wit en 3 360 100 ton geel mielies.

Graan SA beraam die totale kommersiële vraag vir mielies op 5 435 000 ton, terwyl die voorraad wat nodig is om in die eerste 45 dae van die nuwe seisoen te voorsien, 550 000 ton is. Daar is dus 5 985 000 ton mielies vir verbruik nodig, wat beteken dat die oordrag na die bemarkingseisoen van 2005/06 1 721 250 ton kan beloop.

Die Oesskattingskomitee se tweede skatting vir die koringoes beloop 2 050 300 ton — net effens hoër as die vorige skatting 'n maand gelede van 2 029 650 ton.

Jan Cilliers, Landbouweekblad