Volgens berekeninge deur Graan SA bestaan 'n produksieruimte vir die komende produksieseisoen (2004/05) vir sorghum vir slegs ongeveer 87 000 hektaar.  Dit is 'n drastiese afskaling van die vorige aanbeveling (17 Junie 2004) vir 93 000 hektaar. 

Die sewende oesskatting (Augustus 2004) dui daarop dat 'n oes van 317 000 ton verwag word.  Volgens die Julie 2004 SAGIS-syfer, is 346 000 ton sorghum egter reeds gelewer, dit wil sê ongeveer 9% meer as die oesskatting. 

Volgens 'n langtermyn gemiddeld, is die binnelandse vraag vir sorghum ongeveer 251 000 ton.  Uit die nuutste Graan SA vraag- en aanbodontleding vir sorghum, blyk dit dat 'n oordragvoorraad van ongeveer 65 000 ton bo die pyplynbehoefte kan realiseer.  Indien die voorsiene surplus teen die binnelandse vraag van 251 000 ton verreken word, word voorsien dat 'n markruimte vir die komende seisoen van slegs ongeveer 186 000 ton bestaan.  Teen 'n langtermyn gemiddelde opbrengs van 2,14 ton/hektaar, is daar dus 'n produksieruimte vir slegs 87 000 hektaar.  Volgens SAGIS, was daar teen einde Julie 2004 reeds 41 000 ton bittersorghum gelewer wat daarop dui dat daar voldoende bittersorghum as surplus na die nuwe seisoen oorgedra kan word.  Daar is dus geen markruimte vir aanplantings van bittersorghum in die komende seisoen nie.  Graan SA beveel aan dat sorghumproduksie met 27% van aanplantings in die vorige seisoen, afgeskaal word en dat geen bittersorghum sonder 'n kontrak aangeplant word nie.

Produsente word gemaan om kennis te neem van hierdie realiteite wanneer sorghumaanplantings vir die komende seisoen beplan word.  Terugvoer uit die handel dui daarop dat geen voorseisoenkontrakte tans deur kopers aan produsente gebied word nie.

Produsente word ook aangemoedig om in hul produksiebeplanning te verseker dat slegs sorghumkultivars wat wel aan die sorghumbedryf se minimum kwaliteitsvereistes voldoen, aangeplant word.  Die LNR-IGG se kultivarevaluasie- en  kwaliteitmoniteringsprogram maak voorsiening vir die evaluering en plasing van sorghumkultivars in die GM- en GH-klasse.  Die diastase-waardes, wat van groot belang is in die brouproses van sorghumbier, word gebruik om kultivars in die verskillende klasse te plaas.  Produsente wie kultivars aanplant wat nie aan hierdie kwaliteitsvereistes voldoen nie, doen dit op eie risiko.  Navrae oor die nuutste kultivarevaluasieverslae kan gerig word aan die LNR-IGG te Potchefstroom.