Graan SA sal onverantwoordelik wees indien die organisasie enigsins by produsente sou aanbeveel om mielies in die komende produksieseisoen aan te plant sê mnr Bully Botma, Voorsitter van Graan SA.

Die pryssein soos gereflekteer word in die SAFEX kontrak vir mielies vir lewering in Julie 2006 is van so ‘n aard dat nie een van die produksiegebiede (selfs die besproeiingsgebiede) mielies winsgewend……. kan produseer nie.  Die Julie 2006 SAFEX prys was op Woensdag 1 Junie 2005 R720,00 per ton wat ‘n produsenteprys, afhangende van die liggingsdifferensiaal … tussen R520,00 tot R680,00 per ton gee.

Hierdie pryse is nie genoeg om naastenby eers die veranderlike koste om mielies te produseer, goed te maak nie.

Mnr Botma sê egter dat indien die Staat positief op Graan SA se tarief voorstelle sou reageer produsente dit dalk kan oorweeg om ongeveer 800 000 ha mielies te plant.  Dit is 28% van die totale oppervlakte van 2,93 miljoen hektaar wat in die vorige seisoen aangeplant is.

Die verwagte produksie vanaf die 800 000 hektaar sal ongeveer 3,375 miljoen ton oplewer wat saam met die verwagte oordragvoorraad van 5,0 miljoen ton genoeg mielies vir binnelandse en die BLNS land se verbruik sal verseker.