Mnr. Hennie Venter, Voorsitter van die Graan SA Grondbonewerkgroep, en mnr. Jan du Preez, Voorsitter van die SA Grondboneforum, het gesamentlik bekend gemaak dat ‘n gids vir goeie landboupraktyke vir grondboonprodusente bekend gestel is. 

“Die gids is die produk van ‘n Taakspan van die Grondboneforum, en volg op nuwe wetgewing in die Europese Unie en Suid-Afrika wat die toepassing van goeie landboupraktyke noodsaak om aan die vereistes van voedselveiligheid te voldoen.  Die wetgewing in die Europese Unie word vanaf 1 Januarie 2006 toegepas.”, aldus mnr. Du Preez.  

Mnr. Venter het gesê dat die gids ten doel het om produsente te steun om aan die vereistes van plaaslike en internasionale voedselveiligheidsvereistes te voldoen.  Die gids toon prakties aan hoe daar aan die minimum vereistes vir goeie landboupraktyke voldoen moet word, met voorbeelde van rekordhouding.  “Die grootste uitdaging aan produsente sal wees om stappe te neem om rekordhouding van produksieprosesse vir grondbone op te skerp”, sê mnr. Venter.

Riglyne vir toelaatbare vlakke vir chemiese residue op grondbone bestem vir uitvoere, is ook aan die bedryf beskikbaar.  Hierdie data is saamgestel deur die SA Grondboneforum se Tegniese Werkgroep, in oorleg met rolspelers in die bedryf.  Grondboonprodusente word aangemoedig om ag te slaan op die toelaatbare vlakke vir chemiese residue.  Aanduidings is dat beheermaatreëls in 2006 streng deur die Europese Unie en Japan toegepas sal word en indien produkte nie aan minimum vereistes voldoen nie, invoere van Suid-Afrikaanse grondbone selfs verbied kan word.  Produsente word versoek om by die wagperiode en dosis op die etiket van chemiese middels te hou.  Besonderhede van toelaatbare vlakke vir chemiese residue op grondbone, is beskikbaar op die Graan SA webblad by http://www.grainsa.co.za.

Die gids vir goeie landboupraktyke vir die produksie van grondbone, is beskikbaar in Afrikaans en Engels in beide harde kopie sowel as op CD.  Die gids is ook op die webblad van Graan SA beskikbaar by http://www.grainsa.co.za.