Mnr. Hennie Venter, Voorsitter van die Grondbonewerkgroep van Graan SA sê dat kennis geneem is dat baie boere dit oorweeg om, gegewe die groot mieliesurplus, grondboonproduksie drasties uit te brei. 

Produsente word egter aangeraai om in die komende seisoen slegs grondbone aan te plant indien 'n kontrak met 'n koper gesluit is.  By gebreke aan 'n kontrak, kan produsente in Maart 2006 vind dat daar nie kopers vir die produk in die kommersiële marksektor beskikbaar is nie. 

Kommer word ook uitgespreek oor die drastiese afskaling van die kapasiteit van grondboonverwerkingsaanlegte in die afgelope paar maande en word bereken dat daar slegs kapasiteit in Suid-Afrika beskikbaar is om ongeveer 100 000 ton grondbone te verwerk. 

Produsente word ook daarop gewys dat die Regulasie op Voedselveiligheid en Higiëne in die nuwe seisoen toegepas sal word.  Hierdie Regulasie vereis dat voedselveiligheid van die plaas tot op die verbruiker se bord deur goeie praktyke ondersteun sal word, vir grondbone wat bestem is vir die uitvoermark.  Die oudit van goeie praktyke en terugspoorbaarheid van veral chemiese residue sal gemoniteer word.  Hierdie vereistes sal waarskynlik deur 'n kontraktuele verhouding tussen die produsent en die verwerkingsaanleg gereël word. 

"Indien produsente wel besluit om grondbone aan te plant, word aanbeveel dat slegs gesertifiseerde saad gebruik sal word, aangesien kwaliteit grondbone steeds die drywer vir prys, beide vir die uitvoer- sowel as vir die binnelandse mark, sal bly", aldus mnr. Venter.